Kryetari i Bashkisë Tiranë i dhuroi këtë të enjte titullin “Kulla e Sahahtit” ikonës së kinematografisë italiane aktores Ornella Muti. Aktorja italiane theksoi se nga hera e parë deri tani që ka vizituar Shqipërinë, Tirana ka pësuar shumë ndryshime rrënjësore pas atyre viteve të vështira që kanë kaluar duke iu referuar komunizmit.
Ndërsa Veliaj e falënderoi për të gjitha kujtimet e bukura që i la dhënë kinemasë, ku i theksoi aktores se simboli i “Kullës së Sahatit” është kilometri zero i Shqipërisë, dhe se dhurata më e bukur që mund ti bësh dikujt sot është koha.
Njoftimi i plotë:
Kryebashkiaku Veliaj i dhuron “Kullën e Sahatit” aktores italiane, Ornella Muti
Ornella Muti: “Në Tiranë shoh një ndryshim rrënjësor, është e mrekullueshme”
Aktorja ikonë e kinemasë italiane, Ornella Muti, ka vizituar këto ditë Tiranën, për të cilën u shpreh se vitet e fundit, ashtu si edhe Shqipëria, ka pësuar një ndryshim të madh.
Ajo zhvilloi edhe një takim me kryetarin e Bashkisë së Tiranës, Erion Veliaj, i cili i dhuroi asaj simbolin e kryeqytetit, “Kullën e Sahatit”. Aktorja italiane nuk i kurseu fjalët e mira për shqiptarët, të cilët e njohin përmes filmave ikonë të saj me të madhin Adriano Çelentano.
“Kam disa miq shqiptarë, të cilët më kishin thënë se kryebashkiaku juaj është shumë i veçantë. Tani mendoj se je vërtet i tillë, prandaj jam shumë e kënaqur që takoj një kryebashkiak si ju, plot ide të mrekullueshme. Herën e parë që kam ardhur në Tiranë kam qëndruar shumë pak, por tani shoh se qyteti ka pësuar një ndryshim rrënjësor. Po ashtu, edhe Shqipëria ka bërë një përparim të dukshëm. Kjo më duket diçka e mrekullueshme. Ju e meritoni, pas gjithë atyre viteve të vështira”, tha aktorja Muti.
Kryebashkiaku Veliaj i shprehu mirënjohjen asaj, për kontributin në kinematografi dhe për emocionet që i ka dhuruar të gjithë shqiptarëve, sidomos para viteve ‘90.
]2Kjo është Ora e Tiranës, të cilën po ju’a dhuroj. Është kilometri zero i Shqipërisë. Të gjitha distancat maten nga Ora e Tiranës. Dhurata më e çmuar që mund të të bëjë dikush është koha – koha që kemi jetuar, koha kur krijojmë miqësi, koha kur rritemi. Ju’a dhuroj edhe në kujtim të një kohe kur unë isha ende fëmijë, kur ne shqiptarët bënim marifetet me antenat të krijuara vetë, vetëm për të parë filmat tuaj. Të falenderoj për të gjitha kujtimet e bukura”, tha Veliaj.
Gjatë vizitës së saj, aktorja e njohur vizitoi disa nga pikat më tërheqëse të kryeqytetit dhe u njoh më nga afër me ndryshimet në Tiranë./korrieri.al
