Dhjetë persona, përfshirë pesë fëmijë, kanë humbur jetën në një zjarr në një pallat pranë Lionit të Francës, thotë qeveria lokale.
Zyrtarët lëshuan një deklaratë duke thënë se një “zjarr i madh” shpërtheu në një bllok apartamentesh shtatëkatëshe në Vaulx-en-Velin.
Katër persona janë në gjendje kritike për jetën dhe 10 të tjerë raportuan lëndime të lehta.
Zjarri është shuar nga 170 zjarrfikës të cilët janë dërguar në vendngjarje në orën 03:25 (02:25 GMT).
Ministri i Brendshëm, Gerard Darmanin, tha se shkaku i zjarrit nuk dihet ende dhe vlerësoi punën e zjarrfikësve që shpëtuan njerëzit në “kushte jashtëzakonisht të vështira”.
- Ai shtoi se fëmijët që vdiqën ishin të gjithë të moshës nga tre deri në 15 vjeç.
Darmanin tha se një hetim mbi atë që shkaktoi zjarrin do të nisë më vonë të premten.
