POEZI nga Rexhep POLISI
AROMË GRUAJE
Ka ditë, muaj e vite që ec në ajër drejt teje.
Ec bashkë me mendimet e bukura për ty,
Eci dhe përndrihem nga mijëra diej
Si një mal i lartë deri në yjësi…
…
Lumi që gjarpëron në trupin tënd,
Më mbyt, më zhyt në drithërime.
Kjo lojë e çmendur krejt më çmend
Nën rrahjet e zemrës me gjëmime!
MBRËMJE PA KTHIM
Gjithçka që përjetuam bashkë
Ka mbetur aty, në kujtesën e ajrit,
Ajri thartohet nga mungesa e gjatë,
Ndërsa netët ikin nëpër natë…
…
I gjakosur jam nga shenjat
Që ti le në ajrin e athët.
I rrethuar me vështrime
Që s’u bënë kurrë sy më sy.
…
Në qiellin pa hënë asgjë s’pipëtin,
Veç liqeni valëvitet në ujin e tij…
Ka mbetur si gjurmët që lamë pas,
Kujtimi i asaj mbrëmje pa kthim
