Pasiguria, korrupsioni, niveli i papunësisë janë disa nga problemet të cilët detyrojnë shqiptarët që të largohen nga vendi. Një sondazh i publikuar nga Instituti për Demokraci dhe Ndërmjetësim, i titulluar “Besimi në Qeverisje” për vitin 2021, tregon se 41 për qind e të anketuarve duan të lënë Shqipërinë, ndërkohë që 83.1% e shqiptarëve e shohin korrupsionin të përhapur në të gjitha nivelet e qeverisjes dhe rekord mban sistemi i gjyqësorit.
- Një sondazh i publikuar nga Instituti për Demokraci dhe Ndërmjetësim, IDM, i titulluar “Besimi në Qeverisje” për vitin 2021 tregon se shumica e shqiptarëve ndjehen të pasigurtë në jetën e tyre të përditshme, ndërsa 41% e të anketuarve dëshirojnë të largohen nga vendi.
Arsyet kryesore të ndjenjës së pasigurisë, sipas sondazhit, janë kriminaliteti, padrejtësia, niveli i papunësisë, problemet me shëndetin si dhe fatkeqësitë natyrore.
- Korrupsioni mbetet një ndër problemet madhore të Shqipërisë, ndërkohë që besimi i qytetarëve shqiptarë tek institucionet e ndjekjes penale vazhdon të mbetet i ulët.
“83.1% e shqiptarëve e perceptojnë korrupsionin e nivelit të ulët si të përhapur ose shumë të përhapur, ndërkohë që 83.7% e perceptojnë korrupsionin e madh apo të nivelit të lartë me një përhapje të tillë” thuhet në raport.
Pesë institucionet që u renditën si më të korruptuarat në 2021 ishin:
1- Gjyqësori
2- Institucionet e kujdesit shëndetësor
3-Administrata publike
4-Institucionet vendore
5-Policia.
Lidhur me këtë fenomen duket se pjesa më e madhe e të anketuarve nuk kanë besim tek ndëshkimi apo ndjekja penale e korrupsionit prej organeve ligjzbatuese.
Nga ana tjetër, qytetarët e anketuar shprehen më besimplotë tek organizatat ndërkombëtare në Shqipëri, sesa tek vetë institucionet vendase. Sondazhi është realizuar gjatë periudhës kohore 6-21 nëntor 2021 dhe është fokusuar në pjesmarrës nga 61 bashki të Shqipërisë.
