![](https://jehona.info/wp-content/uploads/2022/07/download-3.jpg)
Memorandumi i Parisit (një mekanizëm që kryen inspektimet mbi standardet e anijeve në Evropë) e ka renditur Shqipërinë sërish, për të pestin vit radhazi në listën e vendeve me ‘flamur të zi’. Kjo nënkupton që anijet me flamur shqiptar janë shumë të monitoruara në portet evropiane.
Në listën e këtij viti, Shqipëria renditet përkrah vendeve si Moldavia dhe Togo. Të tre këto vende konsiderohen me rrezik mesatar-të lartë nga Memorandumi i Parisit.
Renditja në listë është bazuar në numrin e përgjithshëm të inspektimeve gjatë një periudhe 3-vjeçare (2019-2021).
Në deklaratën zyrtare Memorandumi njoftoi se 68 vende u ndanë në tre lista, të bardhë, gri dhe të zezë, sipas standardeve të shërbimit dhe sigurisë.
Listat e ‘Bardhë, Gri dhe Zezë’ paraqesin spektrin e plotë, nga flamuj të cilësisë të lartë deri te flamuj me një performancë të dobët, që konsiderohen me rrezik të lartë ose shumë të lartë.
Renditja në listë bazohet në numrin e përgjithshëm të inspektimeve gjatë një periudhe 3-vjeçare.
Respektivisht, 40 flamuj u përfshinë në ‘Listën e Bardhë’, 21 në ‘Listën Gri’ dhe 7 në ‘Listën e Zezë’.
Në vitin 2020, numri i përgjithshëm i shteteve në listë ishte 70, nga të cilat 39 në ‘Listën e Bardhë’, 22 në ‘Listën Gri’ dhe 9 në ‘Listën e Zezë’.
Një vit më parë, Shqipëria u rendit në vendin e 70-të, në fund të listës së zezë, i krahasueshëm vetëm me disa vende afrikane.
Çfarë është Memorandumi i Parisit?
Memorandumi i Parisit ushtron një regjim inspektimi për anijet e regjistruara në porte, përveç atyre me atyre që i përkasin vendit ku është porti, me qëllim që të merren masa kundër anijeve që nuk janë në përputhje me rregullat dhe sigurinë.
Inspektorët quhen oficerë dhe u kërkohet të hetojnë pajtueshmërinë me kërkesat e konventave ndërkombëtare. Inspektimet përfshijnë kontrollimin e anijes dhe personelit nëse janë me ligjet ndërkombëtare në fuqi, aftësitë e drejtuesve dhe pajisjet e anijes.
Në vitin 1978, një numër vendesh evropiane ranë dakord në Hagë për një memorandum për auditimin e kushteve të punës në bordin e anijeve nëse ato ishin në përputhje me rregullat ndërkombëtare.
‘Lista e Bardhë’ përfaqëson anije me flamuj cilësorë me performancë të lartë. Flamujt me një performancë mesatare tregohen në ‘Listën Gri’, që mund të shërbejë si një nxitje për t`u përmirësuar dhe kaluar në ‘Listën e Bardhë’.
Në të njëjtën kohë flamujt në skajin e poshtëm të ‘Listës Gri’ duhet të jenë të kujdesshëm duke mos lënë pas dore kontrollin mbi të anijet e tyre sepse rrezikojnë të përfundojnë në ‘Listën e Zezë’ vitin e ardhshëm. Durreslajm.al